తనిఖీలకు కాదు.. ఉపాధ్యాయులకు అకడమిక్ సహకారమే లక్ష్యం….
అకడమిక్ ప్యానల్ సందర్శనలు విద్యా ప్రమాణాల మెరుగుదలకు దోహదపడాలి….
— కలెక్టర్ కోయ శ్రీహర్ష…
పెద్దపల్లి-జిల్లా ప్రతినిధి, హైదరాబాద్/ అకడమిక్ ప్యానల్ పాఠశాల సందర్శనలు కేవలం తనిఖీలకే పరిమితం కాకుండా ఉపాధ్యాయులకు అవసరమైన అకడమిక్ సహకారం అందిస్తూ, పాఠశాలల్లో నిరంతర విద్యా అభివృద్ధికి దోహదపడేలా ఉండాలని పెద్దపల్లి జిల్లా కలెక్టర్ కోయ శ్రీహర్ష అన్నారు.
హైదరాబాద్లోని ఉస్మానియా యూనివర్సిటీలో రాష్ట్రంలోని మండల విద్యాధికారులు, జిల్లా విద్యాధికారులు, ప్రాంతీయ సంయుక్త సంచాలకుల కోసం నిర్వహించిన ఒకరోజు శిక్షణ, అవగాహన కార్యక్రమంలో ఆయన పాల్గొన్నారు. ఈ సందర్భంగా పెద్దపల్లి జిల్లాలో అమలు చేస్తున్న అకడమిక్ ప్యానల్ విధానంపై రాష్ట్రస్థాయి అధికారులకు ప్రజెంటేషన్ ఇచ్చారు.
తరగతి గది పరిశీలనతో పాటు విద్యార్థుల స్పాట్ అసెస్మెంట్ పెద్దపల్లి జిల్లాలో అకడమిక్ ప్యానల్ ద్వారా పాఠశాలలను క్రమబద్ధంగా సందర్శిస్తూ బోధన–అభ్యసన ప్రక్రియను పర్యవేక్షిస్తున్నట్లు కలెక్టర్ తెలిపారు. ప్రతి పాఠశాల సందర్శనలో తరగతి గది పరిశీలనతో పాటు విద్యార్థుల స్పాట్ అసెస్మెంట్ నిర్వహిస్తున్నామని చెప్పారు.
విద్యార్థుల అభ్యసన స్థాయిని ప్రత్యక్షంగా అంచనా వేసి, వెనుకబడిన అంశాలను గుర్తించి వాటి పరిష్కారానికి అవసరమైన జోక్యాలను ప్రణాళిక చేయాలని సూచించారు. అభ్యసన డేటా ఆధారంగా బోధనా ప్రణాళికలను మరింత ప్రభావవంతంగా రూపొందించాలన్నారు.
ఉపాధ్యాయులకు నిర్మాణాత్మక ఫీడ్బ్యాక్
ఉపాధ్యాయులకు ఇచ్చే ఫీడ్బ్యాక్ నిర్మాణాత్మకంగా ఉండాలని కలెక్టర్ పేర్కొన్నారు. బోధనలోని మంచి అంశాలను గుర్తించి అభినందించడంతో పాటు, మెరుగుదలకు అవసరమైన స్పష్టమైన, ఆచరణ సాధ్యమైన తదుపరి చర్యను సూచించాలని అన్నారు.
అకడమిక్ ప్యానల్ సందర్శనలతో ఉపాధ్యాయుల్లో భయాన్ని కలిగించకుండా, వారి బోధనా సామర్థ్యాలను పెంపొందించేందుకు అవసరమైన సహకారం అందించాలన్నారు.
విద్యార్థుల చురుకైన భాగస్వామ్యానికి ప్రాధాన్యం
తరగతి గదిలో విద్యార్థుల చురుకైన భాగస్వామ్యం, పరస్పర చర్చ, స్వతంత్ర అభ్యాసం పెరిగేలా బోధనా పద్ధతులను రూపొందించాలని సూచించారు.
విద్యార్థులు కేవలం వినేవారిగా కాకుండా ప్రశ్నించడం, చర్చించడం, స్వయంగా నేర్చుకోవడంలో చురుకుగా పాల్గొనేలా ఉపాధ్యాయులు ప్రోత్సహించాలన్నారు.
డిజిటల్ సాధనాలు, బోధనాభ్యసన సామగ్రి, సమర్థవంతమైన ప్రశ్నించే విధానాలను వినియోగించి తరగతి గది అభ్యసనాన్ని మరింత ఆసక్తికరంగా, ప్రభావవంతంగా మార్చాలని సూచించారు.
లోపాల పరిష్కారానికి కాంప్లెక్స్ సమావేశాలు
పాఠశాల సందర్శనల్లో గుర్తించిన బోధన–అభ్యసన లోపాలను పరిష్కరించేందుకు కాంప్లెక్స్ సమావేశాలు, సబ్జెక్ట్ ఫోరమ్లను బలోపేతం చేయాలని కలెక్టర్ అన్నారు. సందర్శనలో గుర్తించిన అంశాలను తదుపరి సమావేశాల్లో చర్చించి, ఉపాధ్యాయులకు అవసరమైన అకడమిక్ సహకారం అందించాలని సూచించారు.
ఎంఈఓలు, కాంప్లెక్స్ హెడ్మాస్టర్లు, అకడమిక్ బృందాలు పాఠశాల సందర్శనల అనంతరం క్రమం తప్పకుండా ఫాలోఅప్ నిర్వహించాలని తెలిపారు. సూచించిన అంశాలపై పురోగతిని నిరంతరం పర్యవేక్షించాలని ఆదేశించారు.
డేటా ఆధారంగా విద్యా ప్రణాళికలు
క్వాలిటీ కోఆర్డినేటర్లు పాఠశాల సందర్శనల వివరాలను క్రమబద్ధంగా నమోదు చేసి, వివిధ పాఠశాలల్లో కనిపిస్తున్న సాధారణ అంశాలను విశ్లేషించాలని కలెక్టర్ సూచించారు. పాఠశాల, మండల స్థాయిలో అవసరమైన లక్ష్యిత అభివృద్ధి ప్రణాళికలను రూపొందించాలన్నారు.
పాఠశాల సందర్శనల ద్వారా లభించే సమాచారాన్ని కేవలం రికార్డుల కోసం కాకుండా విద్యా ప్రమాణాల మెరుగుదలకు ఉపయోగించాలని చెప్పారు. డేటా ఆధారంగా అవసరమైన ప్రత్యేక జోక్యాలను చేపట్టి, వాటి ఫలితాలను తిరిగి పరిశీలించాలని సూచించారు.
విద్యార్థుల అభ్యసన ఫలితాలే అంతిమ లక్ష్యం
అకడమిక్ మానిటరింగ్ లక్ష్యం తప్పులను గుర్తించడం కాదని, ఉపాధ్యాయులకు సహకరించడం, బోధనా పద్ధతులను బలోపేతం చేయడం, విద్యార్థుల అభ్యసన ఫలితాలను మెరుగుపరచడమే ప్రధాన లక్ష్యం అని కలెక్టర్ కోయ శ్రీహర్ష స్పష్టం చేశారు.
పెద్దపల్లి జిల్లాలో అమలు చేస్తున్న అకడమిక్ ప్యానల్ విధానం ద్వారా క్రమబద్ధమైన మానిటరింగ్, నిర్మాణాత్మక ఫీడ్బ్యాక్, డేటా ఆధారిత ప్రణాళిక, నిరంతర ఫాలోఅప్తో పాఠశాలల్లో విద్యా ప్రమాణాలను మరింత మెరుగుపరచవచ్చని తెలిపారు.
ఈ శిక్షణ కార్యక్రమంలో రాష్ట్రంలోని వివిధ జిల్లాలకు చెందిన మండల విద్యాధికారులు, జిల్లా విద్యాధికారులు, ప్రాంతీయ సంయుక్త సంచాలకులు, క్వాలిటీ కోఆర్డినేటర్లు తదితరులు పాల్గొన్నారు.