ప్రతి విద్యార్థిలో చదువు.. లెక్కలపై పట్టు పెరగాలి

ప్రతి విద్యార్థిలో చదువు.. లెక్కలపై పట్టు పెరగాలి…

ప్రాథమిక అక్షరాస్యత, సంఖ్యా పరిజ్ఞానం సాధించేలా ప్రత్యేక కార్యాచరణ…

విద్యార్థుల అభ్యసన పురోగతిని నిరంతరం సమీక్షించాలి…

–జిల్లా కలెక్టర్ కోయ శ్రీహర్ష…

పెద్దపల్లి-జిల్లా ప్రతినిధి,

ప్రతి విద్యార్థి చదవడం, రాయడం, గణితంలో ప్రాథమిక నైపుణ్యాలను సాధించేలా ఉపాధ్యాయులు ప్రత్యేక శ్రద్ధ తీసుకోవాలని జిల్లా కలెక్టర్ కోయ శ్రీహర్ష సూచించారు. ప్రాథమిక స్థాయిలో విద్యార్థులకు బలమైన పునాది ఏర్పడితేనే వారి భవిష్యత్ విద్యాభ్యాసం మెరుగ్గా ఉంటుందని పేర్కొన్నారు.
జిల్లా విద్యాశాఖ ఆధ్వర్యంలో జిల్లా సమీకృత కార్యాలయ సముదాయంలోని సమావేశ మందిరంలో జిల్లాలోని 180 ప్రాథమిక అభ్యసన సామర్థ్య పాఠశాలల ప్రధానోపాధ్యాయులతో ప్రత్యేక సమావేశం నిర్వహించారు. ఈ సమావేశంలో పాల్గొన్న జిల్లా కలెక్టర్ విద్యార్థుల్లో ప్రాథమిక అక్షరాస్యత, సంఖ్యా పరిజ్ఞాన అభివృద్ధి, పాఠశాలల్లో చేపడుతున్న బోధనా కార్యక్రమాల అమలు, విద్యార్థుల అభ్యసన స్థాయిలపై సమీక్ష నిర్వహించారు.

ఈ సందర్భంగా జిల్లా కలెక్టర్ కోయ శ్రీహర్ష మాట్లాడుతూ ప్రతి విద్యార్థి కనీస అభ్యసన సామర్థ్యాలను సాధించేలా ప్రధానోపాధ్యాయులు, ఉపాధ్యాయులు సమన్వయంతో పనిచేయాలని సూచించారు. పాఠశాలల్లో ప్రాథమిక అభ్యసన కార్యక్రమాలను సమర్థవంతంగా అమలు చేయడంతో పాటు విద్యార్థుల అభ్యసన స్థాయిని నిరంతరం అంచనా వేయాలని తెలిపారు.

విద్యార్థుల సామర్థ్యాలను గుర్తించి, వారి అవసరాలకు అనుగుణంగా బోధనా విధానాలను మార్చుకోవాలని సూచించారు. ప్రధానోపాధ్యాయులు ఉపాధ్యాయుల పనితీరును క్రమం తప్పకుండా పర్యవేక్షిస్తూ, ప్రతి విద్యార్థి అభ్యసన పురోగతిపై ప్రత్యేక దృష్టి సారించాలని ఆదేశించారు.

చదవడం, రాయడం, గణితంలో ప్రాథమిక నైపుణ్యాలను ప్రతి విద్యార్థి తప్పనిసరిగా సాధించేలా పాఠశాల స్థాయిలో స్పష్టమైన కార్యాచరణ రూపొందించి అమలు చేయాలని కలెక్టర్ సూచించారు.

మండల విద్యాధికారులు, పాఠశాలల సముదాయ ప్రధానోపాధ్యాయులు తరచూ పాఠశాలలను సందర్శించి బోధనా కార్యక్రమాల అమలును పరిశీలించాలని తెలిపారు. ఉపాధ్యాయులకు అవసరమైన మార్గదర్శకత్వం, సహకారం అందించాలని సూచించారు.

విద్యార్థుల అభ్యసన ఫలితాలను నిరంతరం విశ్లేషిస్తూ, ఎక్కడైనా వెనుకబడిన విద్యార్థులను గుర్తించి వారికి ప్రత్యేక బోధన అందించాలని కలెక్టర్ ఆదేశించారు. విద్యార్థుల అభ్యసనలో లోపాలను గుర్తించిన వెంటనే సరిదిద్దే చర్యలు చేపట్టాలని సూచించారు.

జిల్లా విద్యాశాఖ అధికారులు పాఠశాలల్లో ప్రాథమిక అభ్యసన కార్యక్రమాల పురోగతిని ఎప్పటికప్పుడు పర్యవేక్షిస్తూ, నిర్దేశించిన లక్ష్యాలను సాధించేలా కార్యాచరణ కొనసాగించాలని కలెక్టర్ పేర్కొన్నారు.
“ప్రతి విద్యార్థి చదవడం, రాయడం, గణితంలో ప్రాథమిక నైపుణ్యాలను సాధించేలా కృషి చేయడం ఉపాధ్యాయులందరి ప్రధాన బాధ్యత” అని జిల్లా కలెక్టర్ స్పష్టం చేశారు.

ఈ సమావేశంలో జిల్లా విద్యాశాఖ అధికారి జి. శారద, సహాయ పర్యవేక్షణ అధికారి డా. పి.ఎం. షేక్, వనరుల బృంద సభ్యులు, మండల విద్యాధికారులు, పాఠశాలల సముదాయ ప్రధానోపాధ్యాయులు, 180 ప్రాథమిక అభ్యసన సామర్థ్య పాఠశాలల ప్రధానోపాధ్యాయులు పాల్గొన్నారు.